Iniciativa për Progres fton Ministrinë e Kulturës, Rinisë e Sportit të Kosovës dhe Komunën e Prishtinës që të vendosin shtatoren e Anton Çettës para Ministrisë së Kulturës, tek sheshi kryesor i kryeqytetit. Kjo shtatore do të jetë një shenjë respekti për figurën e këtij intelektuali të madh shqiptar, në përvjetorin e 18 të ndarjes së tij nga jeta, në 3 nëntor.
“Sot u bënë dhjetë vite që kur Anton Çetta u shkri në bronz nga skulptori prishtinas Fatmir Hoxha. Ky personalitet kombëtar, që fitoi respektin e thellë të popullit, ky njeri popullor me edukim evropian, profesor i letërsisë se vjetër shqipe, studiues i romantikes, mbledhës i folklorit dhe mbi të gjitha pajtues i gjaqeve, duhet ta këtë një vend, ku njerëzit e tij mund ta prekin e ta kujtojnë urtësinë e tij”, thuhet në komunikatë.
Sipas INPO-s, deri më sot, institucionet e vendit nuk kanë bërë sa duhet për figurën e Anton Çetës, i njohur për lëvizjen për pajtimin e gjaqeve në Kosovë.