Lëvizja ”Zgjohu” ka reaguar ndaj vendimit të Qeverisë së Maqedonisë për vendosjen e taksës hyrëse për qytetarët e Kosovës në Maqedoni bashkë me automjetet që vijnë nga Kosova.
“Konsiderojmë që ky vendim i njëanshëm i Qeverisë në Shkup dëmton rëndë ekonominë e vendit, por njëkohësisht vendos në situatë të vështirë edhe shqiptarët në të dy anët e kufirit për arsye të lidhjeve të afërta familjare midis tyre. Ky vendim vështirëson edhe qarkullimin e njerëzve në vendkalimet e pakta me Kosovën për shkak të radhëve të gjata të automjeteve”, thuhet në një komunikatë për media.
Sipas tyre, dje qytetarët shqiptar nga Kosova janë grabitur, pasi për pagesën e tyre për të hyrë në Maqedoni iu dorëzonin një fletë absolutisht të pavlefshme në vend të faturës fiskale siç parashihet me ligj.
Lëvizja Zgjohu ftoi Qeverinë e Maqedonisë që t’i lë të qetë qytetarët shqiptarë nga Kosova dhe familjarët e tyre në Maqedoni nga përplasja ekonomike ndërmjet institucioneve të Kosovës dhe Maqedonisë dhe të tërheq menjëherë vendimin absurd dhe të papranueshëm.