Përzgjedhësi i Maltës, Tom Saintfiet, njeh goxha mirë përfaqësuesen e Kosovës në futboll.
Informata për Kosovën ka nisur të mbledhë shumë kohë para se të hidhej shorti për edicionin e parë të Ligës së Kombeve të UEFA-s, të mërkurën e kaluar, shkruan Koha Ditore.
Ka një arsye të veçantë për këtë. Trajneri që ka shëtitur shumë thotë se në vitin 2016 ishte pyetur për mundësinë që të marrë drejtimin e Kosovës.
Një lëvizje që ishte pëlqyer nga trajneri belg nuk ndodhi në vitin 2016, por ai thotë se të ardhmes nuk i dihet.
Saintfiet, 44-vjeçar, vitin e kaluar u emërua përzgjedhës i Maltës, njërës prej përfaqësueseve më të dobëta në Evropë. Malta është kundërshtare e Kosovës në edicionin e parë të Ligës së Kombeve të UEFA-s, që zhvillohet në vjeshtë të këtij viti. Shorti i javës së kaluar vendosi Kosovën e Maltën në Grupin 3 të Ligës D të Ligës së Kombeve të UEFA-s. Liga D është niveli i katërt dhe i fundit i Ligës së Kombeve. Në Grupin 3 bëjnë pjesë edhe Azerbajxhani, që ishte në vazon e parë për short dhe përfaqësuesja e Ishujve Faroe që ishte në vazon e dytë..