Lëvizja Vetëvendosje në Dragash, kërkon nga Drejtoria e Arsimit që të mos bie pre e grupeve të caktuara për të manipuluar me konkursin për mësimdhënës.
Sipas VV-së, deri më tash një vend i punës në këtë komunë ka kushtuar 3 mijë euro.
“Njëri ndër problemet që e ka karakterizuar qeverisjen e kaluar komunale ka qenë rekrutimi i personelit arsimor. Nepotizmi dhe korruptimi kanë qenë faktorë determinues për një vend pune, e jo përgatitja profesionale e cila do të duhej të ishte normalisht”, thuhet në komunikatë të VV-së në Dragash.
“Si pasojë e këtyre dukurive janë shfaqur shumë probleme, të tilla si rënia masive e numrit të nxënësve, dorëheqja e profesionistëve të fushave të ndryshme për të kontribuar në komunën tonë duke parë mosvlerësimin e përgatitjes profesionale të tyre dhe të tjera të ngjashme.
Praktikat nga e kaluara tregojnë raste kur një pozicion i punës në arsim ka “kushtuar” deri në shumën 3000€. “
“Një praktikë e tillë po synohet të vazhdohet edhe nga qeverisja aktuale. Andaj kërkojmë nga Drejtori i Arsimit që mos të bie pre e grupeve të caktuara të interesit që funksionojnë në komunë, në të kundërtën për çdo parregullsi në konkurse do ti drejtohemi organeve të drejtësisë”./PrizrenPress.com/