Lagjen e Saraçëve, Mustafa Arapi e mban në mend ndryshe nga ç’është sot.
Në atë që tash njihet si Qendra Historike e Prizrenit, shumë shtëpi monumentale janë rrënuar për t’u lënë vend ndërtesave të reja apo parkingjeve për vizitorët në qytetin antik.
Në mesin e shembujve të paktë që kanë mbetur aty është shtëpia e familjes Arapi, shkruan Koha Ditore.
Numri i tij i telefonit është në letrën e ngjitur në portën kryesore e të moçme të oborrit të shtëpisë. Është shoqëruar me njoftimin: “Shtëpia në shitje”.
Çerek milioni euro ka vlerën shtëpia rreth 120 vjet e vjetër. Me u rrënu nuk bën. S’e lejon as ligji, e as nuk është dëshira e familjes. Por 75-vjeçari, që është vëllai i madh i familjes thotë se janë të shtrënguar ta shesin shtëpinë, aktualisht e braktisur. Nga Prishtina, ku ai jeton me familjen e ngushtë, rrëfen për mallin, nostalgjinë e kujtimet në Prizren.