Qendra e qytetit të Prizrenit gjatë këtyre ditëve është shndërruar në pikëtakimin e lexuesve me librat dhe autorët. Kjo mundësi është dhënë në edicionin e dhjetë të Panairit të Librit, që po organizohet nga organizata joqeveritare “Instituti për Kulturë dhe Kërkime Sociale”.
IKKS-ja në kuadër të Panairit të Librit “Prizreni 2018” ka sjellë rreth 30 shtëpi botuese nga Kosova, Shqipëria dhe Maqedonia, duke i dhënë kështu lexuesve prizrenas dhe mysafirëve rastin që të gjejnë literaturë të ndryshme në tendat e vendosura në “Sheshin e Dëshmorëve”.
Ndërkohë promovimet dhe bisedat me autorët, përkatësisht mbrëmjet letrare në kuadër të këtij panairi, po mbahen në Kejin mes Urës së Gurit dhe Urës së Arastës, shkruan Koha Ditore.
“Panairi dhe mbrëmjet letrare po mbahen në ambient të hapur me qëllim që qytetarëve t’u sjellim librat dhe autorët në vendin më të frekuentuar, pra në qendër të qytetit”, ka thënë përgjegjësi i programit letrar-artistik, Ditar Kabashi.
Sipas tij, bisedat me autorët do të realizohen çdo mbrëmje në Kej, deri të shtunën. Ndërsa panairi i librave do të jetë i hapur deri të dielën