Nga një hulumtim i GIZ-it gjerman, përmes të cilit mësimdhënësit në kryeqytet i ishin nënshtruar testimit, këta të fundit kishin treguar një rezultat të dobët.
Që atëherë, në vazhdimësi ishte kërkuar që të gjithë mësimdhënësit kosovarë t’i nënshtrohen një testi të tillë për t’i ditur njohuritë e tyre, raporton KTV.
Me gjithë kërkesat, ky test përfundimisht nuk do të mbahet dhe mësimdhënësit parauniversitarë nuk duhet të frikësohen më.
Ministria e Arsimit nga gjysma e shtatorit planifikon të bëjë vetëm vlerësimin e performancës së tyre.
Gashi tregon për formën e vlerësimit, duke thënë se fillimisht vetë mësimdhënësit do ta plotësojnë një formular me pyetje pedagogjike dhe metodologjike.
Dhe, pastaj, sipas tij, vlerësimi do të bëhet edhe nga drejtori i shkollës dhe krejt në fund nga inspektorët e arsimit, të cilët do të jenë prezentë në orët e mësimit.
Gashi e pranon se 21 inspektorë janë numër i vogël për inspektimin e gjithë numrit të madh të mësimdhënësve, për çka thotë se nga viti i ardhshëm planifikohet punësimi edhe i disa të tjerëve.
Por, janë njohësit e arsimit ata që shprehin rezerva se ky proces i testimit do të jetë real, pasi që, sipas tyre, mund të ketë manipulime.
Sidoqoftë, Ministria e Arsimit paralajmëron se ata mësimdhënës, të cilët nuk do të tregojnë performancë të mirë, do t’i nënshtrohen përgjatë një viti mësimit shtesë për zhvillim profesional.
Ndërkaq, ata që tregojnë rezultate të mira do t’u vazhdohet licenca dhe do të avancohen në karrierë.
KohaVisioni i ka dërguar pyetje tash e 10 ditë kryeinspektorit të arsimit për të marrë detaje lidhur me punën e inspektoratit numrin e mësimdhënësve dhe mundësisë së kontrollit të cilësisë por Inspektorati nuk ka dhënë detaje.