Studiuesi Bedri Muhadri do të mbajë nesër, më 14 dhjetor 2018, në Universitetin Publik “Ukshin Hoti” në Prizren ligjëratën “Gjergj Kastrioti – Skënderbeu identiteti historik shqiptar”.
Ligjërata mbahet në kuadër të Vitit mbarëkombëtar të Skënderbeut dhe mbahet në amfiteatrin e Fakultetit Ekonomik të “Ukshin Hotit” duke filluar nga ora 11:00.
Historiani Muhadri gjatë ligjëratës së tij, do të flasë për epokën e Skënderbeut, shtetin e tij dhe kontributin e tij në njohjen e popullit shqiptar gjatë mesjetës, parë edhe në kontekstin e sotëm.
Në një prononcim për Kallxo.com, studiuesi Bedri Muhadri, ka thënë se institucionet shqiptare në kuadër të Vitit të Skënderbeut e kanë vlerësuar figurën e Skënderbeut dhe njëkohësisht kontributin dhe sakrificën e terë popullit shqiptarë të asaj kohe që u bashkua nën flamurin shtetëror mesjetar të kohës së Skënderbeut.
“Epoka e Skënderbeut është gurë themeli më i arrirë ndonjëherë në historinë tonë shqiptare, ngase rezulton se aktivizimi i tërë potencialit arbëror në atë kohë, përballoi sulme shumë të mëdha pushtuese nga osmanët dhe nga luftërat e pakta kundër Venedikut”, ka thënë Studiuesi Muhadri, i cili do të ketë edhe një bashkëbisedim me audiencën me rastin e këtij prezantimi.