Për ish-ushtarin e UÇK’së, Remzi Shalën, që njihet me nofkën “Molla e Kuqe”, është lëshuar flet arrest për shkak se nuk është paraqitur në seancën në Gjykatën Themelore të Prizrenit, ku po akuzohet për krime lufte nga prokuroria.
Gjykata Themelore e Prizrenit ka lëshuar flet arrest për Remzi Shalën, që njihet me nofkën “Molla e Kuqe” për shkak të mos paraqitjes në seancë gjyqësore që po mbahet kundër tij dhe ku po akuzohet për krime të luftës nga Prokuroria.
Lajmin për lëshimin e flet arrestit e kanë konfirmuar për T7 Zyra për Informim e Gjykatës Themelore të Prizrenit.
Gjithashtu, në seancë nuk ka qenë i pranishëm as avokati i Remzi Shalës, për shkak se Oda e Avokatëve të Kosovës janë në grevë.
Remzi Shalës ka një muaj që i ka shkuar ftesa për intervistim nga Gjykata Speciale, por që nga ajo ditë ai është në arrati.
Për vendndodhjen e të akuzuarit deri më tani askush nuk është në dijeni.
Remzi Shala, në momentin kur u bë e ditur se ka marrë ftesë për intervistim nga Gjykata Speciale, ka folur ekskluzivisht për Gazetën Express, ku ka thënë se nuk e ka ndërmend të paraqitet tek specialët.
Shala, nga Suhareka, ka thënë për Gazetën Express se nuk do t’i përgjigjet thirrjes së Gjykatës Speciale – duke rrezikuar kështu që të gjobitet apo edhe të dënohet me burgim, siç e paralajmëron thirrja.
Një ditë pas kësaj interviste, ai u arratis.
Ftesën për paraqitje në Hagë Shala e ka për datën 17 janar të këtij viti./GazetaExpress/