Kompleksi memorial për martirët, në fshatin Korishë të komunës së Prizrenit, ka mbetur në këtë gjendje që nga viti 2011.
Për punimet në këtë kompleks, janë ndarë rreth 200 mijë euro nga buxheti i komunës së Prizrenit, brenda një periudhe 5-vjeçare, raporton KTV.
Në kohën e qeverisjes së kaluar, në vitin 2011, ishte nënshkruar një kontratë në vlerë prej mbi 145 mijë eurove nga drejtoria e Kulturës në këtë komunë.
Kurse, edhe gjatë qeverisjes së Vetëvendosjes, u nënshkrua një kontratë e re në vlerë të 47 mijë eurove, por këtë herë nga drejtoria e Administratës.
Kryetari i fshatit Korishë ka thënë se kryetari i komunës u ka premtuar atyre që do ta përfundojë këtë memorial, por që ende nuk është bërë asgjë.
Kryetari i Prizrenit, Mytaher Haskuka, kishte akuzuar javë më parë qeverinë e kaluar për keqpërdorim të parasë publike në projektin e këtij memoriali.
Në komunën e Prizrenit kanë thënë se kanë pasur probleme pronësore, andaj edhe nuk kanë mundur të punojnë aty.
E, për akuzat që i ka drejtuar Haskuka kundër qeverisë së kaluar, ish-drejtori i Administratës në Prizren ka thënë se kryetari po mundohet që t’i mbulojë dështimet e tij.
Gjysma e punimeve në kompleksin memorial në Korishë janë financuar nga vetë banorët.
Në këtë kompleks janë të varrosur 88 martirë.