Drejtoria Komunale e Shëndetësisë në bashkëpunim me Institutin Regjional të Shëndetit Publik në Prizren dhe OJQ-të lokale, kanë organizuar aktivitet vetëdijësues me rastin e Ditës Botërore të Tuberkulozit.
Me qëllim të informimit dhe ngritjes së vetëdijes së qytetarëve në lidhje me parandalimin e kësaj sëmundjeje, në sheshin Shatërvan u organizuan aktivitete sensibilizuese dhe u dhanë fletëpalosje me këshilla mjekësore për qytetarët e rastit.
Drejtori i Drejtorisë së Shëndetësisë, Visar Shehu, i cili ishte i pranishëm në këtë aktivitet theksoi se identifikimi i hershëm i kësaj sëmundjeje është shumë i rëndësishëm për nga aspekti i shëndetit publik dhe kostos më të ulët në krahasim me koston e shërimit.
Me rastin e Ditës Botërore të Tuberkulozit, nesër më 22 mars në orën 13:00 në Qendrën Kryesore të Mjekësisë Familjare do të mbahet edhe një ligjëratë informuese për tuberkulozin.