Të enjten në mbrëmje, në Gjakovë, shoqata e intelektualëve “Jakova” mbajti një akademi nderimi për të shënuar 90-vjetorin e lindjes së shkrimtarit Rexhep Hoxha dhe 60-vjetorin e romanit “Lugjet e verdha”, shkruan sot Koha Ditore.
Ndonëse nuk ishte fizikisht i pranishëm për shkak të shëndetit të rënduar, pjesëmarrësit në këtë akademi kishin folur për jetën dhe veprën e Rexhep Hoxhës. Vetëm disa orë më vonë shkrimtari dha grahmat e fundit pas një sëmundjeje të shkurtër. Si autor i librave të parë për fëmijë në gjuhën shqipe në Kosovë, krijimtaria e tij letrare prej gjashtë dekadash vlerësohet për vlerat edukative për fëmijët, ngjyrat e theksuara nga përrallat shqiptare dhe sensi për të tejçuar virtyte nga më të fismet.
I njohur për qëndrimet e tij jokonformiste, Rexhep Hoxha kishte pasur guximin t’u kundërvihej edhe letrarëve e poetëve si Ibrahim Rugova, Adem Demaçi e Ali Podrimja, kurse me Fahredin Gungën dhe Maks Velon kishte këmbyer qëndrime nga më të ashprat.
I lindur më 25 dhjetor 1929 në Gjakovë, Hoxha përfaqëson brezin e parë të shkrimtarëve për fëmijë në Kosovë. Pasi kishte përfunduar Normalen në qytetin e tij të lindjes, ai studimet për gjuhë dhe letërsi shqipe i mbaroi në katedrën e albanologjisë në Universitetin e Beogradit. “Gjethe të reja”, një përmbledhje me poezi e botuar në vitin 1953, konsiderohet si libri i parë për fëmijë i botuar pas Luftës së Dytë Botërore në Kosovë.
(Shkrimin e plotë e gjeni në numrin e sotëm të “Kohës Ditore”)