Katër persona janë vrarë në rajonin e Prizrenit në javën e fundit.
Rasti i parë u shënua të mërkurën e 22 janarit, kur D.H. dhe S.H., burrë e grua, u vranë në shtëpinë e tyre në Prizren. Për këtë rast akoma nuk ka të arrestuar.
Rasti i dytë ishte ai i pasdites të së dielës, ku një 19-vjeçar vdiq si pasojë e therjes me thikë gjatë një përleshjeje në rrugën “Xhevat Berisha”. Policia ka arrestuar dy të dyshuar.
Në rastin e tretë, vrasja ka ndodhur në fshatin Maqiteve të Suharekës. Aty u vra një 44-vjeçar. Për këtë rast është arrestuar një person.
Aktivisti i shoqërisë civile, Ismet Kryeziu, ka shtruar dilemën nëse mungesa e perspektivës zhvillimore e varfëria e skajshme janë ndër arsyet kryesore për depresion kolektiv e vrasje të përditshme. Ka shtuar se ky fenomen tani po merr karakter të normalitetit ditor.
“Në Prizren e Suharekë, për katër ditë katër të vrarë. Mungesa e perspektivës zhvillimore, varfëria e skajshme në të cilën po jetojmë, a janë ndër arsyet kryesore për depresion kolektiv e vrasje të përditshme. Ndoshta dhe përpara ka pasur vrasje, por po më duket tani ky fenomen po merr karakter të normalitetit ditor”, ka shkruar ai në Facebook./Insajderi/