Obelisku i dy pilotëve amerikanë, David A. Gibbs dhe Kevin L. Roichert, në Prizren, nuk është dëmtuar nga dora e njeriut.
Kryetari i Prizrenit, Mythaer Haskuka, tha se memoriali është dëmtuar nga kushtet atmosferike.
Postimi i Haskukës
Disa portale dhe në rrjete sociale sot janë shpërndarë dezinformata lidhur me dëmtimin e memorialit të dy ushtarëve amerikanë, David A. Gibbs dhe Kevin L. Roichert, të cilët dhanë jetën gjatë luftës më 5 maj 1999, derisa ishin duke fluturuar me aeroplanët e NATO-s për misionin paqësor.
E vërteta e dëmtimit të këtij memoriali është se ka ndodhur për shkak të kushteve atmosferike, dhe jo për shkak të dëmtimeve të qëllimshme prej ndonjë personi. Kjo është dëshmuar edhe pas verifikimit në terren nga zyrtarët komunalë.
Përndryshe, fatkeqësisht edhe ky memorial është në gjendje të mjerueshme sikurse shumë memorialet e tjera, për shkak të punëve jokualitative dhe të mangëta që janë bërë gjatë ekzekutimit në të kaluarën. Për këtë arsye, Komuna e Prizrenit sivjet ka paraparë një kod të veçantë buxhetor për rregullimin e këtyre memorialeve.
Fillimi i këtyre punimeve është vonuar për shkak të vonesës së buxhetit dhe situatës së krijuar nga pandemia, por me të kaluar kjo periudhë do të fillojmë menjëherë me rregullimin dhe mirëmbajtjen e të gjitha monumenteve në komunën tonë, duke filluar nga memoriali në Lez, e deri tek ky memorial i dy ushtarëve amerikanë.