Premtimi i kryeministri të Kosovës, Hashim Thaçi, për rritje të pagave për shërbyesit civilë dhe ata të Administratës Publike, kishte gëzuar shumë përfaqësuesit e këtyre dy kategorive. Gëzimi ka dalë të ketë qenë i kotë pasi kryeministri Thaçi nuk e ka mbajtur premtimin e dhënë dy vite më parë për rritje të pagave për shërbyesit civilë dhe ata të Administratës Publike nga 30% deri në 50%.
Përveç rritjes së pagave për këto dy kategori, Thaçi ishte zotuar se do t’ua paguante edhe dy paga për muajin janar dhe shkurt të vitit 2011, por as kompensimi e as rritja nuk kanë ndodhur.
Gazeta ka provuar të marrë një përgjigje nga Zyra e Kryeministrit në lidhje me mospërmbushjen e këtyre premtimeve, por një shpjegim i kësaj zyre ka munguar,shkruan Tribuna.
Nga ana tjetër, përfaqësues të këtyre dy sindikatave, ndihen të mashtruar nga kryeministri Hashim Thaçi. Ata vlerësojnë se këto kategori janë më të nëpërkëmbura në institucionet e Kosovës. Mursel Zymberi, kryetar i Sindikatës së Shërbyesve Civilë, ka konfirmuar për gazetë Tribuna, se premtimet e kryeministrit për rritje të pagave nuk janë realizuar asnjëherë.
