EULEX-i ka vendosur që seanca fillestare ndaj ish-komandantit të përgjithshëm të UÇK-së, Sylejman Selimit dhe 3 personave të tjerë, të akuzuar për krime lufte, të mbahet më 27 nëntor. Lajmin për KTV-në e ka konfirmuar Tomë Gashi, avokat i Selimit.
Rasti është i dyti për Sylejman Selimin, që bashkë me Ismet Haxhës, Nexhat Qubrelit dhe Shefki Hysenin akuzohen se kanë maltretuar dy dëshmitare në Likoc në vitin 1998. Shefki Hyseni akuzohet për përdhunimin e dëshmitares së mbrojtur A.
“Unë kam marrë njoftimin se seanca është caktuar më 27 nëntor dhe do të mbahet në Gjykatën Themelore të Mitrovicës në Veri”, i ka thënë KTV-së, Tomë Gashi.
Është një nga rastet e rralla kur seancat mbahen në Gjykatën Themelore të Mitrovicës.
“Nëse për një rast, që është ai ndaj Grupit të Drenicës, është vendosur që për shkaqe të sigurisë, seancat të mbahen në Prishtinës, përjashtime nuk duhet të ketë as për këtë rast”, ka thënë avokati Gashi.