Të dielen më 14 mars do të mbahen zgjedhjet e brendshme të Lidhjes Demokratike të Kosovës për të përzgjedhur kryetarin e ri, pas dorëheqjes së kryetarit Isa Mustafa.
Mustafa dha dorëheqje nga pozita e të parit në LDK pas rezultatit të dobët të kësaj partie në zgjedhjet e 14 shkurtit. Në garë për të marr drejtimin e partisë më të vjetër në vend, për momentin janë katër kandidatë por gjatë punimeve të kuvendit mund të ketë edhe kandidime të tjera.
Pas rezultatit më të dobët në historinë e LDK-së, një ditë pas zgjedhjeve, Isa Mustafa dha dorëheqje nga pozita e kryetarit, duke i hapur rrugë mbajtjes se zgjedhjeve të reja në këtë subjekt politik. Anëtari i Kryesisë së LDK-së, Anton Quni, qe i pari që e shpalli kandidaturën për ta pasuar Mustafën në krye të partisë më të vjetër në vend. Kandidaturën për të parin e LDK-së e kanë shpallur edhe Lutfi Haziri, Lumir Abdixhiku e Besian Mustafa. Të gjithë këta kandidatë janë shprehur se do ta kthejnë LDK aty ku ka qenë si partia më e madhe në vend. Një ndër themeluesit e LDK-së, historiani Jusuf Buxhovi, ka thënë për Radio Kosovën se reformimi në LDK është i domosdoshëm. Duke mos komentuar rreth kandidatëve për të parin e LDK-së, Buxhovi tha se LDK duhet të ringritet, por nuk beson që kjo do të ndodhë pas zgjedhjeve të së dielës.
“LDK është një parti historike. Rikthimi dhe ringritja e saj është po ashtu historike, sepse skena politike në Kosovë pa LDK-në, jo vetëm që mbetet pa një opozitë, por mbetet edhe pa fundamentin e vet që ia mban baraspeshën parlamentarizmit. Por se kur do të rikthehet dhe a do të rikthehet pas këtyre zgjedhjeve, është një çështje shumë diskutabile”, thotë Buxhovi.
Statuti i LDK-së e përcakton se kandidaturat për kryetar bëhen gjatë punimve të kuvendit. Neni 25 i statutit e parasheh që secila kandidaturë duhet të miratohet me 50 për qind plus një të delegatëve të pranishëm.
Duke marrë parasysh faktin se kuvendi i LDK-së ka 355 delegatë, përfshirë edhe kryetarin e partisë, secilit kandidat potencial i nevojiten 178 vota përkrahëse për të hyrë në garën e kandidatëve për kryetar.
Në historinë e LDK-së, Isa Mustafa është i pari kryetar që ka dhënë dorëheqje. LDK-ja është themeluar më 1989 dhe që atëherë ka pasur tre kryetarë: Ibrahim Rugovën, Fatmir Sejdiun dhe Isa Mustafën.