Në këtë reagim thuhet se është për keqardhje neglizhenca dhe paaftësia e pushtetit lokal në Prizren.
Ky është reagimi i plotë:
Këto ditë të nxehta ku temperaturat në Prizren po shkojnë lartë mbi 30 gradë celzius, qytetaret prizrenas po kërkojnë freski në vende ku ka pak më shumë gjelbërim.
Qeveria komunale e drejtuar nga kryetari Mytaher Haskuka, përveç që në katër vite nuk ka shtuar asnjë metër katror sipërfaqe të gjelbëruar, por ka lejuar degradimin e skajshëm të sipërfaqeve aktuale dhe tkurrjen e tyre me betonime gjithandej. Mjafton të bëhet një ecje nëpër lagjen Ortakoll dhe do ta shihni makinerinë e betonimit që ky pushtet ka vu në lëvizje pa mëshirë nëpër hapësira publike.
Në anën tjetër, parku i vetem i qytetit, i mbipopulluar këtyre ditëve, duket si mos më keq. Mbeturina gjithandej, drurë që u thyhen degët dhe bien përtoke duke rrezikuar jetërat e qytetarëve, tualetet jashtë funksionit, ndriçim që punon pjesërisht brenda dhe jashtë parkut, lumi i mbushur me mbeturina që notojnë mbi të si dhe kaos e parregullsi gjithandej në parkimin e veturave mbi hapësirën e gjelbëruar të parkut..
Është për keqardhje se si me neglizhencën e paaftësinë e pushtetit aktual, Prizreni u shndërrua nga një qyteti që konsideroheh ndër më të pastërtit në vend, në qytetin më të ndotur!
Si është e mundur me qenë kaq të paaftë e të painteresuar për të ofruar një shërbim të hajrit për qytetarët që mes tjerash njihen si taksapaguesit ndër më të rregullt në vend.
Prizreni dhe prizrenasit nuk e meritojnë një trajtim të tillë, prandaj e shpejtë do të jetë koha kur ata vet do ti ndëshkojnë me votën e tyre këtë administratë që ka dështuar plotësisht në përmbushjen e obligimeve dhe përgjegjësive të veta karshi qytetarëve.
Prizren
29.06.2021