Ish-shefi ekzekutiv i Formula 1, Bernie Ecclestone, beson se Lewis Hamilton nuk do të kthehet të garojë përsëri në sezonin e ardhshëm.
Ecclestone mendon se mënyra e fitimit të kampionatit të Max Verstappen, duke mposhtur Hamilton-in në xhiron e fundit të garës së fundit të sezonit, e ka “mbytur” emocionalisht britanikun.
“Unë nuk mendoj se ai do të kthehet, unë mendoj se ai nuk do të garojë vitin e ardhshëm”, tha Ecclestone.
“Zhgënjimi i tij në Abu Dhabi ishte shumë i madh dhe unë e kuptoj atë. Tani, i barabartë me shtatë tituj me Michael Schumacher, ai mund të pensionohet dhe të mirret me diçka tjetër”.
“Disa ditë më parë fola me babanë e tij dhe menjëherë kuptova se ai nuk donte të fliste për të ardhmen e djalit të tij, ndaj folëm vetëm për biznes”, përfundoi Ecclestone.
Hamilton ende nuk ka thyer heshtjen e tij për mediat pas asaj gare dramatike pothuajse dy javë më parë, duke bërë që shumë njerëz të besojnë se pensioni është nën konsideratë serioze nga shtatë herë kampioni i botës.
/Albanianpost.com