Ministrja e Drejtësisë, Albulena Haxhiu, sot gjatë një konference për media ka thënë se është përmbushur rreth 80 për qind e agjendës legjislative të Qeverisë gjatë këtij viti.
Haxhiu ka thënë se gjatë kësaj periudhe është arritur të adresohen dhe përmbushin zotimet e dhëna, raporton “Betimi për Drejtësi”.
Oferta nga DEPPO MARKET
“Së bashku me ekipin e kabinetit tim dhe shumë shërbyes civilë të MD-së dhe bashkëpunëtorë të jashtëm kemi arritur që të përmbushim zotimet tona që parashihen edhe në programin qeverisës, zotime këto që i kemi thënë edhe para qytetarëve të Kosovës”, ka thënë Haxhiu.
Ajo tha se si MD janë të përkushtuar për të arritur objektivat e tyre.
“I kemi dhënë detyrë vetes që me vullnet të hekurt të punojmë për shtetin e së drejtës përmes reformimit të thellë të sistemit të drejtës si kusht i domosdoshëm për të vënë drejtësinë në vend dhe për ta kthyer besimin e qytetarëve në institucionet e drejtësisë”, ka thënë Haxhiu,
Ajo ka thënë se problemet që kanë pasur gjatë vitit me institucionet e tjera të drejtësisë si KPK kanë ndodhur për shkak të reformave që duan të bëjnë në këtë sistem. /BetimipërDrejtësi