Pavarësisht faktit se tetë persona janënë bankën e të akuzuarve për zhdukjen e 1.4 milionë eurove të MPB-së, zvarritja e këtij procesi e zbeh mundësinë që paratë ndonjëherë t’i kthehen Qeverisë.
Një aferë që e tronditi Kosovën një vit më parë, ajo e Ministrisë së Punëve të Brendshme (MPB) ku u tretën si “kripa në ujë” 1.4 milionë euro të destinuara për furnizim me pasaporta biometrike, po vazhdon të mbetet në “margjina”, nga aspekti politik. Pavarësisht se për këtë skandal që u bë toplajm edhe i medieve ndërkombëtare po ballafaqohet në gjykatë Natali Velija dhe tetë të akuzuar të tjerë.
Megjithatë kjo shumë e parave të “zhdukura” duket se do t’i transferohet si barrë qeverisë së ardhshme, ndërsa analistët thonë se është shumë vështirë të kthehen ato para, aq më shumë kur ky proces po zvarritet. Pas një viti në paraburgim dhe nga arrestimi i saj, Velija doli para gjykatës si e akuzuar për herë të parë më 21 nëntor të këtij viti, shkruan Zeri.
Zgjatja e proceseve gjyqësore në vend, jo pak të ndihmuara dhe me legjislacion krijon përshtypjen e pafajësisë së të akuzuarit dhe zbeh dyshimet për fajësinë e tij. Kjo po ndodh që nga paslufta në vend. Të akuzuarit për korrupsion më shumë denoncohen nga mediat dhe mbesin në kronikat e lajmeve të zeza, kurse nga gjykatat lëndët e këtyre rasteve rrinë me vite nëpër sirtarë.