Kryetari i Prizrenit, Shaqir Totaj, priti sot shefin e misionit të Luksemburgut në Kosovë, Eric Dietz dhe Geneviéve Hengen, zëvendësdrejtoreshë për Bashkëpunim Dypalësh në Drejtorinë e Bashkëpunimit Zhvillimor dhe Veprimit Humanitar – Ministria e Punëve të Jashtme dhe Evropiane e Luksemburgut.
Bazuar në përkrahjen dhe miqësinë e vazhdueshme me Luksemburgun, me këtë rast, u bisedua për format e bashkëpunimit për realizimin e projekteve të përbashkëta në të ardhmen, duke i shpeshtuar takimet.
Temë diskutimi ishin bashkëpunimet dhe organizimi i aktiviteteve me fokus agjendën e gjelbër dhe inovacionin, si dhe bashkëpunim në zhvillimin e arsimit e shëndetësisë.
Kryetari Totaj, ripërsëriti se synimi afatgjatë i Komunës së Prizrenit mbetet që partneriteti me miqtë ndërkombëtarë të thellohet dhe të fokusohet në bashkëpunim më të ngushtë ekonomik e zhvillimor.
Ai potencoi se ndër prioritetet e qeverisjes aktuale lokale është përmirësimi i dukshëm i kushteve për investime të huaja me synimin për ta bërë Komunën e Prizrenit më atraktive, në çdo sferë./ PrizrenPress.com