Tifozët ultras të Paris Saint-Germain i kanë dërguar një mesazh të frikshëm Dusan Vlahovic-it, i cili është objektivi i kampionëve të Ligue 1.
Me Lionel Messi-n tani në Inter Miami dhe të ardhmen e Kylian Mbappe-s të pasigurt, Luis Enrique është i prirur të sjellë një sulmues të ri gjatë afatit kalimtar së verës.
Vlahovic, i cili gjithashtu ka qenë objektiv edhe i Chelsea-t dhe Tottenham-it, thuhet se është gjithashtu në radarin e gjigantëve francezë.
Megjithatë, ultrasit e klubit i kanë dërguar një paralajmërim kërcënues sulmuesit të Serbisë.
Ultrasit kanë pozuar jashtë stadiumit “Parc des Princes”, duke paralajmëruar se do t’ia presin gishtat nëse ai vjen nga Juventus-it
Në pankartë shkruhet: “Nëse vini, do t’ju presim tre gishtat”.
Gazeta spanjolle, “Marca”, pretendon se mesazhi është në përgjigje të tre gishtave që Vllahovic tregoi pas një ndeshje ndërkombëtare me Serbinë.
Tifozët i janë referuar gjestit nacionalist të sulmuesit 23-vjeçar i cili jo rrallë ka dhënë edhe mesazhe politike që kanë të bëjnë kryesisht me Kosovën.
Pas një ndeshje me kombëtaren e tij, Vlahovic e kishte veshur njëherë edhe një bluzë ku shihej në foto Kosova si pjesë e Serbisë.
Derisa gjesti me tre gishtat e ngritur është veprim që bëhet edhe në raste kur serbët duan të dërgojnë mesazhe për pronësinë e proklamuar prej tyre në raport me Kosovën dhe gjithashtu është përdorur si veprim nga paramilitarë serbë që kishin kryer krime në Kosovë.
Kujtojmë që Vlahovic nuk i ka përmbushur plotësisht pritshmëritë që kur iu bashkua Juventus-it në janar të vitit të kaluar nga Fiorentina për shumën e 80 milionë eurove.
Ai ka shënuar vetëm 23 gola në 63 ndeshje në të gjitha garat me fanellën bardhezi. Albanian Post