Fakulteti i Mjekësisë në Universitetin e Prishtinës ka ri-shqyrtuar lëndët për konkursin e përzgjedhjes së stafit akademik. Rreth 45 lëndë u patën kthyer për ri-shqyrtim në këtë fakultet pasi që nuk ishin respektuar kriteret e konkursit dhe Statutit. Zyrtarë të Universitetit, bëjnë të ditur se pasi të përfundojë ky proces, do të merren hapa të tjerë.
Prorektori për mësim në Universitetin e Prishtinës, Nuri Bexheti, tha për Radio Kosovën, se senati ka kthyer lëndët për konkursin e përzgjedhjes së kandidatëve për asistentë në Fakultetin e Mjekësisë, me qëllim që të zgjedhën më të mirët, e që janë konform rregullores dhe Statutit. Ai tha se ky Fakultet duhet të reflektojë në përzgjedhjen e kandidatëve për rekrutim si asistentë të Universitetit të Prishtinës.
“Tani janë ngritur komisionet prapë atje, shumica kanë ardhur dhe së shpejti do t’i publikojmë përsëri në buletin. Senati ka ardhur në këtë konstatim sepse është rënë ndesh me disa nga pikat kyçe të rregullores, p.sh disa kandidatë kanë qenë me moshë më të vjetër, ndërsa disa të tjerë me notë mesatare studimi më të ulët se sa e parashikon Statuti”.
Mësohet se tashmë Fakultet i Mjekësisë ka shqyrtuar pothuajse të gjitha lëndët që ditë më parë u patën kthyer për rishqyrtim nga Senati i Universitetit. Sipas Bexhetit, pasi të përfundojë ky proces, do të merren hapa të tjerë.
“Kur të mbyllim këtë fazë të konkurrimit, atëherë do të bëjmë bilancin dhe konform vendimit që do të marrim do të ketë edhe hapa të mëtutjeshëm.
Ndërkohë, nëse pas ri-shqyrtimit të lëndëve, përsëri vërehen parregullsi apo shqetësime të tjera, atëherë mund të ndëshkohen përgjegjësit e parregullsive në konkurs.