Liria e Prizrenit ka përkujtuar sot me respekt të thellë dhe krenari figurën e Përparim Thaçit – një nga sportistët më të dalluar të historisë së klubit dhe njëherazi dëshmor i rënë për lirinë e Kosovës, raporton PrizrenPress.
I njohur për përkushtimin, talentin dhe shpirtin luftarak në fushën e lojës, Thaçi ishte një nga figurat kyçe të FC Lirisë gjatë viteve të ’90-ta. Por kur vendi kërkonte më shumë se gola dhe fitore, ai hoqi dorë nga futbolli për t’iu bashkuar radhëve të Ushtrisë Çlirimtare të Kosovës, duke zgjedhur rrugën e sakrificës për atdheun.
“Kur thirrja e atdheut u bë më e fortë se çdo ëndërr personale, Përparimi zgjodhi rrugën e sakrificës,” thuhet në mesazhin përkujtimor të shpërndarë nga klubi. Ai ra dëshmor në vijën e frontit, duke lënë pas një trashëgimi të pavdekshme si sportist dhe atdhetar.
“FC Liria – gjithmonë me kujtimin për ty, Përparim!”, përmbyllet mesazhi.
Sot, emri i tij qëndron i gdhendur jo vetëm në historinë e klubit, por edhe në kujtesën kolektive të qytetarëve të Prizrenit – si simbol i rrallë i bashkimit ndërmjet sportit, guximit dhe dashurisë për lirinë./PrizrenPress.com
