Qyteti i Malishevës, do të ketë kujdestari të barnatores edhe gjatë natës. Drejtori për Shëndetësi, Hajdin Berisha, ka bërë të ditur, se ka arritur marrëveshje me barnatoren “Triti-Pharm”, e cila do të bëjë kujdestari, vullnetarisht edhe pas orarit të paraparë për punë, pas orës 22:00. Sipas drejtorit Berisha, deri te arritja e kësaj marrëveshje, me këtë barnatore, kanë ardhur pas bisedave me të gjithë pronarët e barnatoreve që veprojnë në Malishevë, por që vetëm “Triti Pharm”, ka pranuar vullnetarisht të punoj gjatë tërë natës.
Kujdestaria e barnatoreve ka qenë nevojë e qytetarëve të Malishevës, ndërsa në Komunë, në vazhdimësi janë paraqitur kërkesa dhe ankesa nga qytetarët, për mos kujdestarinë nga ana e barnatoreve në Malishevë, dhe për këtë qëllim, drejtori i drejtorisë për shëndetësi, ishte angazhuar maksimalisht, deri në arritjen e kësaj marrëveshje me këtë barnatore.
“Triti Pharm”, e ka marrë këtë obligim vullnetarisht dhe nga tani, të gjithë ata që kanë nevojë, mund të shërbehen edhe natës me barna./PrizrenPress.com/