Frankie Knuckles, i cili njihet si një ndër themeluesit e muzikës moderne elektronike me punën e tij si DJ, producent dhe remiksues në vitet e 1980-ta dhe 90-ta, ka ndërruar jetë të hënën. Shkaktari i vdekjes së tij nuk është bërë i ditur.
I njohur si “Kumbara i Muzikës House”, Knuckles ka lëshuar muzikë në klubet e natës në Çikago, “Warehouse” — prej ku edhe ka mbetur termi “muzika house” — dhe në “Power Plant” në fund të viteve të ’70-ta dhe në fillim të ‘80-tave, më pas lansoi këngët e tija hit Your Love (1986), “Baby Wants To Ride” (1987) dhe “The Whistle Song” (1991).
Remiksat e tij të njohur janë “Ain’t Nobody” (1989) dhe “Love Affair’s Blind” (1991). Knuckles ka remiksuar edhe këngët e Michael Jackson, Whitney Houston dhe Depeche Mode. Në përgjithësi ai njihej për remiksat e tij të gjatë.
Popullariteti i muzikës “house” që lëshohej në klubet e Çikagos pushtoi botën, ndërsa Knuckles në vitet e ’90-ta nisi bashkëpunimet edhe me produksionet të ndryshme.
Megjithëse problemet shëndetësore ia kishin ngadalësuar punën atij viteve të fundit, Knuckles vazhdoi të punonte në profesionin e tij të dashur nëpër ndeja e festivale të shumta deri pak kohë para vdekjes.