Kanë përfunduar xhirimet në qytezën e Lipjanit të filmit të metrazhit të shkurtër “Çlirimi” me regji dhe skenar të Burim Halitit, thuhet në njoftim për media.
Ky film trajton temën e luftës në Kosovë. Skenari i filmit paraqet një arsimtar dhe një nxënës, të cilët mbesin të ngujuar në një shkollë fillore. Ata mbijetojnë brenda shkollës për disa muaj, deri sa në fund ndodhë diçka e papritur.
“Xhirimet kanë shkuar me sukses dhe janë përmbyllur sipas planit, kanë qenë 7 ditë xhirime ku është punuar me intensitet të madh”, shprehet regjisori Burim Haliti.
Burim Haliti, ndryshe është i njohur për filmin e tij “Hekurishtja”, i cili ka marr pjesë në shumë festivale ndërkombëtare dhe i ka sjell regjisorit mjaft sukses.
Filmi është në fazën e postproduksionit dhe pritet që të kompletohet në shtator të këtij viti, ndërsa premiera mendohet të jetë në ndonjë festival të filmit ndërkombëtar në Europë, thuhet me tutje në njoftim.
Ky film është mbështetur nga Qendra Kinematografike e Kosovës me 9 mijë euro dhe është prodhim i kompanisë “Eureka Film & Production”, në rolet kryesore janë Xhelal Haliti dhe Valmir Selimi.