Për herë të parë Papa Françesku tregon arsyet se pse zgjodhi të vizitojë Shqipërinë.
I pyetur nga gazetarët gjatë fluturimit të kthimit nga Korea e Jugut, Papa ka vlerësuar harmoninë fetare në Shqipëri. “Shkoj në Shqipëri për dy arsye të rëndësishme. E para sepse kanë arritur të krijojnë një shtet dhe të mendojnë për Ballkanin, unitetin kombëtar mes islamit, ortodoksëve, katolikëve me një këshill ndërfetar që ndihmon shumë në ekuilibrim.
Kjo është gjë shumë e mirë, sepse ka harmoni. Dhe prezenca e Papës është për t’i thënë të gjithë popujve se mund të punohet bashkë dhe unë e kam ndjerë si të ishte një ndihmë për atë popull fisnik”, ka thënë Papa Françesku.
Udhëtimi apostolik i Shenjtërisë së Tij, Papa Françesku, që do të zhvillohet në Tiranë më datën 21 shtator, parashikon një agjendë të ngjeshur, që do të zgjasë plot 11 orë në Shqipëri. Në orën 07:30, Papa Françesku fluturon nga aeroporti i Fiumicino-s drejt Aeroportit Ndërkombëtar “Nënë Tereza”, në Tiranë, ku do të zhvillohet një pritje zyrtare nga kryeministri, Edi Rama. Më pas, Papa udhëton drejt Presidencës, ku do të zhvillojë një takim me presidentin Bujar Nishani dhe autoritete të tjera të Shqipërisë.
Në orën 11:00, në sheshin “Nënë Tereza”, Papa Françesku do të mbajë meshën e shenjtë para mijëra besimtarëve, që priten të mblidhen atë ditë.
Nga vizita të tjera, ku Papa është parë të udhëtojë me makinën e tij të bardhë, këtë radhë bëhet me dije se, në vizitën e tij në kryeqytetin shqiptar, Papa do të lëvizë me një makinë të thjeshtë dhe të hapur, e vënë në dispozicion nga autoritetet e Shqipërisë.
Në orën 13:30 është planifikuar takim dhe drekë me Ipeshkvijtë shqiptarë në Nunciaturën Apostolike, e më pas takim me krerët e besimeve të tjera fetare.
Ora 17:00 shënon kremtimin e lutjes së mbrëmësores me meshtarët, seminaristët dhe lëvizjet laike në Katedralen e Tiranës. Në orën 19:45, në Aeroportin “Nënë Tereza” do të zhvillohet një ceremoni për largimin e Papës, ku edhe përmbyllet vizita e tij në Shqipëri.