Aktgjykimi final i Gjykatës Kushtetuese lidhur me seancën konstituive të Kuvendit ka lënë shumë dilema. Vendimi nuk ka sqaruar as se kush do ta ketë të drejtën e thirrjes së seancës së radhës të Kuvendit të Kosovës. Me Kushtetutë është e paraparë që seanca konstituive e Kuvendit të thirret nga Presidentja. Mirëpo Kushtetuta nuk e parasheh se kush mund ta thërrasë seancën në një situatë çfarë edhe është krijuar më 17 korrik. Dilema ende vazhdon.
Megjithatë, Sekretari i Kuvendit të Kosovës, Ismet Krasniqi, pret që seanca të thirret nga Flora Brovina si udhëheqëse e seancës së parë konstituive. Megjithatë, ai thotë se duhet të priten diskutimet që mund të rrjedhin nga partitë politike në lidhje me këtë çështje. “Çfarë të kërkojnë nga ne, ashtu edhe do të veprojmë. Mirëpo parimisht mendoj se Flora Brovina do ta thërrasë seancën e ardhshme”, ka thënë Krasniqi për gazetën Tribuna.
Mendim të njëjtë, se kujt mund t’i takojë e drejta e thirrjes së seancës, ka edhe njohësi i çështjeve kushtetuese, Riza Smaka. Ai thotë se pasi gjykata ka vendosur për vazhdim të seancës në pikat e mbetura, atëherë seancën e thirr Flora Brovina si kryesuese e seancës së kaluar. “Mirëpo seancën mund ta thërrasë edhe presidentja Atifete Jahjaga”, ka thënë Smaka..