Në mbledhjen e sotme të Kuvendit të Komunës së Rahovecit u debatua për disa çështje me rëndësi për qytetarët e kësaj komune. Ndër pikat më të ndjeshme të rendit të ditës ishte edhe formimi i Këshillit të fshatit Hoçë e Madhe.
Pas diskutimeve të gjata dhe mospajtuese, këshilltarët i ndanë qëndrimet në dy kahe. Derisa një grup ishte kundër miratimit të këtij vendimi, grupi tjetër mbronte qëndrimin se duhet të respektohet legjislacioni, respektivisht Ligji për Hoçën e Madhe, i miratuar më 20 prill 2012 nga Kuvendi i Republikës së Kosovës.
Fillimisht këshilltari Azbi Gashi (LVV) paraqiti një deklaratë me shkrim, ku ju kërkonte këshilltarëve komunal të mos e votojnë vendimin për shpalljen e konkursit publik për anëtarë të këtij Këshilli. Këtë kërkesë e mbështeti këshilltari Bahtjar Hoti (LB), i cili tha se në këtë mënyrë krijohet pabarazia ndërmjet qytetarëve të komunës së Rahovecit, ndërsa privilegjet për një grup etnik ndikojnë në thellim të ndarjeve etnike.
Nënkryetari i Komunës Xhemali Haxhimustafa, tha se Kuvendi i Komunës është para një vendimi të vështirë, mirëpo duhet të kemi parasysh faktin se kemi të bëjmë me një vendim të Kuvendit të Kosovës, ndërsa ne i kemi shteruar të gjitha mundësitë tona për të kundërshtuar miratimin e këtij ligji. Edhe kryesuesi i Kuvendit Nahit Elshani, u pajtua që ligji është miratuar pa pajtimin e komunitetit shumicë dhe pas kundërshtimeve të shumta edhe të Kuvendit edhe të ish kryetarit e të shoqërisë civile. Si organ komunal ne jemi të obliguar të zbatojmë ligjet në fuqi, prandaj kërkoj mirëkuptimin e këshilltarëve. Ne duhet të marrim vendim për shpalljen e konkursit publik dhe të zgjedhim anëtarët e komisionit intervistues për zgjedhjen e anëtarëve të këtij Këshilli, në mënyrë që të hapet rruga e zbatimit të ligjit.
Kundër këtij vendimi janë deklaruar edhe Ejup Kabashi e Kadri Dellova (PDK), si dhe disa këshilltarë të tjerë. Pas gjithë këtij debati polarizues, kryesuesi i Kuvendit Elshani, propozoi që marrja e këtij vendimi të shtyhet për mbledhjen e radhës. Sipas Ligjit, Kuvendi i Komunës obligohet që të formojë Këshillin e fshatit prej pesë anëtarësh; anëtarët do të zgjidhen me konkurs publik, dy do të jenë nga komuniteti serb i fshatit, dy nga komuniteti shqiptar, ndërsa një do ta delegojë kisha ortodokse serbe. /PrizrenPress.com/