Organizata Botërore e Shëndetësisë, e cila ka publikuar një raport të detajuar botëror rreth vetëvrasjeve, raporton se në vendin tonë vetëvriten më tepër meshkujt sesa femrat.
Raporti i OBSH-së i referohet vitit 2012, ku rezulton se në vendin tonë u vetëvranë 205 persona, nga të cilët 112 ishin meshkuj dhe 93 femra. Numri më i lartë i viktimave është në grupmoshat mbi 70 vjeç, të cilët zënë dhe 19.3 për qind të numrit total të vetëvrasjeve.
Sipas raportit të OBSH-së, numri i përgjithshëm i vetëvrasjeve ka pësuar një rënie me 15.3 për qind, në krahasim me vitin 2000, por ajo që vihet re është fenomeni i rritjes së rasteve te grupmoshat 15-20 vjeç dhe mbi 50 vjeç. Pas personave mbi 70 vjeç, numri më i lartë i vetëvrasjeve rezulton të jetë te moshat 50-69 vjeç, ndërsa pas tyre vijnë 30 dhe 49-vjeçarët. Numri më i ulët i vetëvrasjeve shihet te moshat 5-14 vjeç, me 0.8 për qind të totalit. Por, në nivel global situata është mjaft kritike, pasi sipas raportit të prezantuar në Gjenevë, çdo 40 sekonda i jep fund jetës një person.
“Më shumë se 800 mijë persona i japin fund jetës çdo vit dhe përpjekjet për vetëvrasje janë rritur 20 herë më shumë”, thuhet në raport.
OBSH-ja ka mbledhur të dhënat e 10 viteve mbi vetëvrasjet, duke përfshirë të gjitha vendet e botës, ndërsa i kushton një kapitull të veçantë rritjes së ndërgjegjësimit mbi sfidat që përfaqëson ky fenomen për shëndetin publik. Kjo organizatë kërkon nga qeveritë e vendeve anëtare që ta bëjnë prioritet luftën ndaj këtij fenomeni, i cili po merr përmasa gjithnjë e më shqetësuese edhe për shkak të gjendjes ekonomike dhe mostrajtimit të sëmundjeve të shëndetit mendor.