Pas një takimi të mbajtur sot në mes të liderëve të Koalicionit LDK-AAK-Nisma dhe përfaqësuesve të Listës Serbe, u konfirmua mbështetja e Listës Serbe për seancën e 12 shtatorit.
Përfaqësuesi i Listës Serbe, Alexandar Jabllanovic, ka shprehur edhe një herë mbështetjen për Koalicionin LDK-AAK-Nisma.
“Ne do ta mbështesim shumicën, dhe Blloku LDK-AAK-Nisma e kanë shumicën në parlament. Ata do ta kenë mbështetjen tonë në seancën e 12 shtatorit,” ka thënë Jabllanovic.
Ndërkaq kryetari i AAK’së, Ramush Haradinaj, ka falënderuar Listën Serbe për vendosmërinë e treguar, ndërsa ka thënë se edhe me Vetëvendosjen është arritur një marrëveshje parimore, e cila do të nënshkruhet ditëve në vijim. Haradinaj, ka thënë ta kenë caktuar edhe datën për nënshkrimin e kësaj marrëveshjeje, sipas të cilës Vetëvendosja do të jetë partner i rëndësishëm në ndërtimin e institucioneve.
“Kemi marrëveshje me Listën serbe dhe do të shkojmë bashkë në seancë. Marrëveshja me VV’në është arritur. Është marrëveshje parimore, ku VV’ja do të jetë partner i rëndësishëm në ndërtimin e institucioneve. Marrëveshja do të nënshkruhet ditëve në vijim, para seancës së 12 shtatorit,” ka thënë Haradinaj pas këtij takimi.