Ka nisur rinovimi i objektit shkollor në gjimnazin “Hamdi Berisha” të Malishevës, pas një muaji nga fillimi i viti të ri shkollor. Ndërkohë që nga kjo fundjavë pritet të fillojë rinovimi edhe në 21 shkolla të tjera. Drejtori i Arsimit i Malishevës, Blerim Thaçi, vonesën e nisjes së rinovimit të objekteve shkollore e ka ndërlidhur me ridestinimin e mjeteve buxhetore dhe procedurat e prokurimit.
“E kemi bërë me kohë kërkesën që të rinovohen 32 objekte shkollore gjatë pushimit të verës, mirëpo për t’u realizuar rinovimi i tyre nuk kemi pasur mjete të mjaftueshme financiare dhe është dashur të kërkonim nga Komuna miratimin e ridestinimit të mjeteve shtesë”, ka shpjeguar ai, shkruan Koha Ditore. Ndërkaq ai ka theksuar:
“Kërkesa jonë nuk ka kaluar në KK dhe atëherë jemi detyruar të planifikonim realizimin e rinovimit të 22 objekteve shkollore me ato mjete që kanë qenë për këtë destinim dhe është procesuar në prokurim, e pastaj procedurat e prokurimit na kanë sjellë deri këtu”, ka shtuar ai.