Në fund të qëndrimit të Tij në New York, në kuadër të pjesëmarrjes në Sesionin e 69-të të Asamblesë së Përgjithshme të Kombeve të Bashkuara, Presidenti i Republikës, Bujar Nishani organizoi një pritje, ku ishin të ftuar bashkatdhetarë, drejtues të shoqatave të diasporës dhe personalitete shqiptaro-amerikane me veprimtari të shquar atdhetare e shoqërore.
Në këtë takim ishte i pranishëm edhe Kongresmeni Eliot Engel. Presidenti vlerësoi veprimtarinë e Këshillit Kombëtar Shqiptaro-Amerikan me Medaljen “Gjergj Kastrioti Skënderbeu” dhe personalitetet e spikatura Anton Athanasi (pas vdekjes), Harry Bajraktari, Richard Lukaj dhe Nicholas Pano me Medaljen “Nderi i kombit”.
“Shqiptarët e Amerikës kanë treguar kapacitete të admirueshme përsa i përket përfitimit nga mundësitë e ofruara nga liria e demokracia për ta bërë ëndrrën amerikane realitet. Megjithatë, pavarësisht suksesit, ata asnjëherë nuk harruan rrënjët shqiptare. Përkundrazi, ata vunë në dispozicion të kombit të ty re të origjinës energjitë mendore, aftësitë intelektuale, mundësitë që demokracia amerikane ofron dhe burimet e ty re financiare”, theksoi Nishani në fjalën e mbajtur, raporton Start.
Duke folur për rajonin, Nishani përmendi shqiptarët e Maqedonisë, ata të Luginës së Preshevës dhe të Malit të Zi.
“Shqiptarët në Maqedoni, si një element shtetformues, po bëjnë përpjekje institucionale dhe me mjete demokratike për të zbatuar Marrëveshjen e Ohrit. Ata mbështesin proceset demokratike dhe integrimin euroatlantik të Maqedonisë. Shqiptarët në Luginën e Preshevës dhe në Malin e Zi po përpiqen për realizimin e të drejtave të ty re në përputhje me standardet më të përparuara demokratike, me dialog institucional dhe duke mbështetur konsolidimin e demokracisë dhe shtetit ligjor në shtetet ku jetojnë”, theksoi Nishani.