Asambleistja e Lëvizjes Vetëvendosje! në Prizren, Drita Millaku ka akuzuar Qeverinë e Ramadan Mujës, se po i keqpërdorë taksat e qytetarëve për shëtitje.
Sipas saj, Drejtoria e Arsimit në Prizren i ka dërguar në shëtitje në Shqipëri, pa arsye të gjithë drejtorët e shkollave.
“Së fundi, Drejtoria e Arsimit ka dërguar të gjithë drejtorët e shkollave, pa ndonjë arsye të veçantë”,tha Millaku.
Sipas saj, drejtorët e shkollave janë dërguar në shëtitje, ndërkaq që gjendja e sigurisë nëpër shkolla vazhdon të jetë shqetësuese.
“Nuk ekziston përkujdesja e mjaftueshme në sigurimin e shkollave, në të cilat pothuajse çdo ditë kemi rrahje e therje të nxënësve”.
“Rasti më i freskët i rrahjes së nxënësve ka ndodhur dje në Shkollën e Mjekësisë “Luciano Matroni” ku vetë drejtori i shkollës ka bërë presion tek nxënësit për të mos e denoncuar rastin në polici”.
“Në kushte të tilla, Drejtoria e Arsimit mendon për relaksimin e drejtorëve, sepse nuk iu ka mjaftuar pushimi 3 mujor gjatë verës”.
“Si duket Qeveria Komunale është e specializuar për organizimin e ekskursioneve në kushte të gjendjes së jashtëzakonshme në Komunë. Një i tille është bërë edhe më datën 29 gusht ku punëtorët e Komunës janë dërguar në një pushim njëditor në Deçan”
“Skandalet dhe politikat që po i aplikon Drejtoria e Arsimit, tashmë sektorin e arsimit në Prizren e kanë sjellë në nivelin më të ulët se të viteve 90-ta”/PrizrenPress.com/