Asociacioni i Gazetarëve të Kosovës ka mirëpritur vlerësimet e Raportit të Progresit të Komisionit Evropian për Kosovën, në fushën e medies dhe shpreh shqetësim për lirinë e medies në vend dhe kushtet e pafavorshme për ushtrimin e lirë të profesionit të gazetarisë në Kosovë.
Bazuar në të dhënat e prezantuara, Asociacioni i Gazetarëve kundërshton çdo lloj presioni mbi gazetarët përderisa shpreh bindjen se ndërhyrja politike në punën e gazetarëve dhe cenimi i fjalës së lirë është kundër interesave shoqërore.
Të vetëdijshëm se liria e shprehjes dhe e medies është një prej vlerave më të rëndësishme të Bashkimit Evropian, udhëheqja e re e AGK-së, siç përmendet edhe në Raportin e Progresit, mbetet e përkushtuar në mbrojtjen e të drejtave dhe lirive të gazetarëve si dhe krijimin e një ambienti të sigurt për punë sa më profesionale. /PrizrenPress.com/