Kryetari i Prizrenit, Ramadan Muja është dorëzuar përballë shantazheve të partisë në koalicion, AAK-së. Ai është pajtuar që të punësohen pa konkurs militantët e AAK-së.
“PrizrenPress” muajn e kaluar kishte raportuar se zyrtarët e AAK-së e kanë kërcënuar Mujën se nuk do të votojnë rishikimin e buxhetit për vitin 2015-2017 -të, nëse nuk do t’i punësojë militantët e partisë së tyre. Ky kushtëzim e ka detyruar kryetarin Muja që të dorëzohet përballë shantazhit të AAK-së.
Fillimisht ai është detyruar ta punësojë asamblistin e AAK-së, Bujar Nerjovajn, si mësimdhënës në shkollën “Pjetër Budi” në Lugishtë të Hasit. Punësimi i Nerjovajt është bërë vetëm një ditë para votimit të buxhetit komunal për vitin 2015-2017-të. Burimet e “PrizrenPress”-it bëjnë të ditur se AAK-ja, pas punësimit të Nerjovajt, ka kërkuar nga Ramadan Muja që të punësohen edhe disa militantë të tyre.E ‘çerdhen’ e punësimit ata e kanë gjetur në Drejtorinë e Arsimit.
Asambleistja e Lëvizjes Vetëvendosje! Drita Millaku në një hulumtim, ka arritë të zbulojë punësimet që AAK-ja i ka bërë nëpër shkollat e Prizrenit. Sipas saj, të gjitha këto punësime janë bërë pa konkurs.
“Drejtori i Administratës Ilir Baldedaj, punësoi të shoqen e vetë si sekretare në shkollën “Ibrahim Fehmiu” pa kurrfarë konkursi”, tregon Millaku.
“Pa konkurs edhe në shkollën “Abdyl Frashëri” është zgjedhur sekretari i kësaj shkolle duke e trashëguar këtë post si në monarki nga babi i vetë, i cli pas pensionimit e solli të birin në krye të detyrës që ushtronte më parë”.
“Por kësilloj privilegjesh në arsim u bënë edhe për ish-koordinatorin e arsimit Shukri Çuni, i cili pasi i fitoi votat për asamble komunale, nuk iu lejua që t’i mbaj dy poste, atëherë e rehatuan në shkollën e mesme “Remzi Ademaj“ kuptohet, pa konkurs. Pa konkurse u punësuan edhe dy mësimdhënëse në shkollën e mjekësisë” Luciano Matroni” në lëndën e letërsisë shqipe”.
Një burim brenda Komunës së Prizrenit me kusht anonimiteti ka treguar për ‘PrizrenPress”, se kryetari Ramadan Muja është pajtuar që AAK të punësojë militantët e vetë, pasi që një gjë e tillë ishte edhe pjesë e marrëveshjes së koalicionit në mes PDK-së dhe AAK-së.
“ Zyrtarët e AAK-së kanë kërkuar që të zbatohet marrëveshja e nënshkruar me PDK-në gjatë balotazhit të Mujës me Eqrem Kryeziun”, tregon burimi.
AAK në Prizren nuk është hera e parë që ka kërcënuar kryetarin e Komunës, Ramadan Muja.
Kryetari i Degës së AAK-së, Lulëzim Kabashi në zgjedhjet nacionale pat kërcënuar PDK-në, se do të dalë nga koalicioni nëse vazhdon t’ia marrë nëndegët nëpër fshatra. Ky kërcënim është përsëritur nga Kabashi edhe pas zgjedhjeve nacionale./PrizrenPress.com/