Me vënien e gurëthemelit, ka filluar edhe zyrtarisht ndërtimi i objektit të ri të shkollës në fshatin Bubavec, duke shënuar kështu ndërtimin edhe të një shkolle tjetër në Komunën e Malishevës. Në fillimin e punimeve mori pjesë edhe kryetari i Komunës së Malishevës, Ragip Begaj, nënkryetari i komunës Rexhep Mazreku, kryesuesi i KK të Malishevës, Enver Hoti, drejtori i arsimit Blerim Thaçi, stafi i mësimdhënësve të shkollës dhe banorë të shumtë të Bubavecit.
Me këtë rast, kryetari i Komunës së Malishevës, tha “ndihem jashtëzakonisht i kënaqur, që po i vëmë gurëthemelin e shkollës së re dhe po forcojmë dijen e të ardhmes sonë dhe jam i bindur se nga këtu do të dalin kuadro që do ti duhen vendit. Unë po kujtoj “fjalët e qiriut“ nga Naim Frashëri dhe po ju bëj me dije se dikush është flijuar për neve, është djegur në zjarrin e luftës, që ne sot të jemi të lirë dhe të ndërtojmë shkolla të reja,në mënyrë që të forcojmë dijen e vendit dhe neve na duhet shumë punë për ta ndërtuar vendin dhe për ta arsyetuar gjakun e derdhur për lirinë e këtij vendi”. Begaj më pas i ka uruar banorët e fshatit Bubavec, për shkollën e re.
Drejtori i shkollës, Maliq Kryeziu, duke marrë fjalën, e ka falënderuar Komunën e Malishevës dhe kryetarin Begaj, për këtë investim, në ndërtimin e shkollës.
Ndërtimi i shkollës në Bubavec, është mundësuar nga buxheti i Komunës së Malishevës dhe kap një shumë prej mbi 280 mijë euro. /PrizrenPress.com/