Ndonëse Zyra për Informim e Kuvendit të Kosovës i ka njoftuar mediet se nesër nga ora 12:00 do të mbahet vazhdimi i seancës konstituive ku pritet të zgjedhet kryetari dhe Kryesia e re e Kuvendit, ata të cilët do të duhej të njoftoheshin zyrtarisht, përfaqësuesit e popullit nuk kanë marrë njoftim me shkrim nga Sekretaria e Kuvendit.
Këtë e ka konfirmuar për Gazetën Blic, deputetja e Lidhjes Demokratike të Kosovës, Alma Lama.
“Zyrtarisht askush nuk na njoftuar për vazhdimin e seancë së nesërme të Kuvendit të Kosovës”, ka thënë Lama për Gazetën Blic.
Është praktikë e Kuvendit të Kosovës, që kur ka seanca të papritura apo të jashtëzakonshme, deputetët pos me shkrim, njoftohen edhe përmes telefonit.
Pas takimit të sotëm që kanë pasur lideri i LDK-së, Isa Mustafa me atë të PDK-së, Hashim Thaçi janë dakorduar që vazhdimi i seancës konstituive të mbahet nga ora 12:00. Ndërkaq, marrëveshja ndërmjet dy partive pritet të nënshkruhet nesër në ora 10:00.
Gazeta Blic ka mësuar se pas zgjedhjes së Kryetarit dhe të Kryesisë së re të Kuvendit, ndodh që gjatë ditës së nesërme të zgjedhet edhe Qeveria.