Ndryshimet që Ministria e Punës dhe Mirëqenies Sociale, ka bërë në ligjin e përfituesve të skemës sociale, rrezikon që shumë familje të mbesin pa këtë mbështetje të cilën deri më tani e kanë pasur një pjesë e familjeve, edhe nga Komuna e Malishevës, dhe largimet nga kjo skemë do ta rëndojnë edhe më shumë situatën sociale.
Kështu u bë e ditur sot në mbledhjen e Këshillit të Drejtorëve, ku drejtori për shëndetësi dhe mirëqenie sociale, Hajdin Berisha, ka paralajmëruar, se “ndryshimet që ministria ka bërë në këtë ligj, ku janë ashpërsuar kriteret për të qenë përfitues i skemës sociale, do të sjellë telashe edhe për komunën, pasi shumë familje, mund të mos jenë më përfitues të saj dhe gjendja sociale e tyre, do të vështirësohet edhe më shumë”.
Përndryshe në mbledhjen e rregullt të Këshillit të Drejtorëve, drejtorët komunal raportuan për aktivitetet e drejtorive të tyre, në këtë përfundim të vitit dhe përmbylljes së projekteve, e të cilat janë jo pak të realizuara gjatë këtij viti, që do të prezantohen këtë të mërkurë në debatin me qytetar, që do të mbaj Kryetari i Komunës së Malishevës,Ragip Begaj.