Këngëtarja e mirënjohur britanike, Adele, të premten, më 20 nëntor do të publikojë një album të ri, pas katër vitesh.
Adele ka publikuar albumin e saj të parë “19” në vitin 2008, më pas albumin “21” në vitin 2011, ndërsa albumi i saj i ri do të titullohet “25”, duke aluduar në moshën e këngëtares.
“Hello” është kënga e parë e albumit të ri, që u publikua para disa javësh dhe pati sukses shumë të madh, duke thyer të gjitha rekordet e shkarkimeve në internet. Një këngë tjetër që këngëtarja e ka prezantuar nga ky album është “When we were young”, të cilën ajo e interpretoi në një intervistë për mediat australiane, ndërkaq këngët e tjera po priten me kureshtje nga adhuruesit e muzikës së saj.
Rikujtojmë se këngëtarja është bërë e famshme më këngët e saj “Someone like you” dhe “Rolling in the deep”, të cilat e bën atë artisten e parë të gjallë të ketë dy këngë në top listat më të njohura botërore.