I pyetur nëse pas përleshjeve në Kumanovë ekziston rrezik nga një luftë e re, Ahmeti mohon një rrezik të tillë, duke shtuar se nuk ka arsye për këtë.
Lideri i BDI-së Ali Ahmeti në një intervistë për gazetën austriake “Prese” konfirmon se disa luftëtarë të ish-UÇK-së në Maqedoni kanë qenë pjesë e grupit të armatosur në Kumanovë, por thekson se motivet dhe qëllimet e tyre nuk i ka të qarta dhe se nuk ka arsye për luftë të re.
“UÇK-ja në Maqedoni u çmobilizua në vitin 2001 siç u dakordua me marrëveshjen paqësore të Ohrit. personat të cilët tani i referohen UÇK-së, këtë e bëjnë si individë. Ata nuk mund të flasin në emër të organizatës dhe nuk veprojnë në pajtim me vendimin nga viti 2001”, theksoi Ahmeti.
Ajo që njeh disa anëtarë të grupit të Kumanovës, sipas liderit të BDI-së, nuk do të thotë se mbështesin çfarë do qëllime të cilat janë në kundërshtim me atë që është dakorduar në Ohër në vitin 2001. Formimi dhe qëllimet e grupit në Kumanovë mbesin një sekret, thotë Ahmeti, duke shtuar se nuk dëshiron të marrë pjesë në teoritë e komplotit që zgjerohen nëpër mediume.
Ahmeti shpreh shqetësim nga reagimet që vijnë nga Moska në lidhje me ngjarjet në Maqedoni.
“Ministri rus i Punëve të jashtme Sergej Lavrov tha se zgjerimi euroatlantik i Ballkanit paraqet provokim për Rusinë. Para disa ditësh pohoi edhe se ngjarjet në Maqedoni janë provokuar nga NATO-ja, BE-ja dhe Uashingtoni. Këtë fuqishëm e hedh poshtë. Të gjithë qytetarët tanë qartë theksuan se dëshirojnë inkuadrim në NATO”, deklaroi Ahmeti.
Sipas tij, ekziston një mundësi që Rusia të tentojë ta rrisë ndikimin në Maqedoni dhe porosit se Moska në këtë nuk do të ketë sukses sepse është në kundërshtim me atë që angazhohen shumica e qytetarëve të Maqedonisë.
I pyetur nëse pas përleshjeve në Kumanovë ekziston rrezik nga një luftë e re, Ahmeti mohon një rrezik të tillë, duke shtuar se nuk ka arsye për këtë.
Lideri i BDI-së konsideron edhe se nuk ka nevojë për revizion të Marrëveshjes së Ohrit ose për krijimin e një revizioni të ri që të rregullohet bashkëjetesa midis shqiptarëve dhe maqedonasve në Maqedoni, transmeton RTK.
“Çdo tentim për marrëveshje të reja do të ishte një hap mbrapa. Duhet të punojmë që fryma dhe dispozitat e Marrëveshjes së Ohrit të shndërrohen në vepër”, thotë Ahmeti.
Si obligim nga Marrëveshja e Ohrit i cili, sipas tij, ende nuk është realizuar, është përdorimi i gjuhës shqipe si gjuhë zyrtare. Konsideron se Marrëveshja e Ohrit dhe Kushtetuta qartë tregojnë se gjuha shqipe duhet të jetë gjuhë zyrtare në Maqedoni, por, siç thekson, pala maqedonase këtë e interpreton më ndryshe për çka janë ftuar ekspertë nga Belgjika dhe Zvicra të cilët duhet të ndihmojnë rreth rregullimit ligjor të përdorimit të gjuhës shqipe.