Me moton “PDK – Pronto Departamenti i Korrupsionit”, shoqëria civile e ka bërë një aksion simbolik para zyrave të Partisë Demokratike të Kosovës, në shenjë pakënaqësie me veprimet e disa zyrtarëve të kësaj partie, të cilat dëgjohen nga përgjimet e siguruara nga Insajderi.com.
“Ju kam bashkuar grupit #PROTESTOJ për të shprehur pakënaqësinë që kemi kundrejt sistemit të korruptuar politik. Sot po e shpallim ashtu siç është, siç kanë dëshirë anëtarët e saj si Departamentin më të madh të korrupsionit në vend – kjo është PDK-ja”, ka thënë Edona Bajrami nga shoqëria civile.
“Ne i kemi dëgjuar me kujdes bisedën e Kadri Veselit – udhëheqësit të Pronto Departamentit të Korrupsionit, i cili u munduar ta relativizonte gjithë punën dhe skandalet e PDK-së”, ka thënë më tej ajo.
Ajo ka thënë se do të vazhdojnë të organizohen deri në dorëheqjen e Adem Grabovcit dhe të atyre që kanë përfituar nga veprimet e tij.
Gjithashtu, ajo u ka bërë thirrje të gjithëve që nesër t’u bashkohen në protestën e radhës.