1.8 C
Prizren
E martë, 31 Janar, 2023

Anton Quni jep dorëheqje nga posti i kryetarit të LDK-së në Prizren

Anton Quni ka dhënë dorëheqje nga detyra e kryetarit të Lidhjes Demokratike të Kosovë – Dega në Prizren.

Quni ka thënë se dorëheqje po jep pasi nuk ka marrë rezultatet e duhura në zgjedhjet lokale.

“Të dashur qytetarë, Unë, sot kam dhënë dorëheqje nga detyra e kryetarit të LDK-së – Dega në Prizren. Këtë vendim e mora si përgjegjësi morale e imja për mosarritjen e rezultatit të duhur në zgjedhjet lokale. Përkundër ngritjes së numrit të votave, në krahasim me zgjedhjet nacionale 2021, dhe rritjes se numrit të kuvendarëve, ishte e pamjaftueshme që të jemi në raundin e dytë për të parin e komunës”, ka pohuar ai.

Mes tjerash, ai ka njoftuar se autorizimet e tij i ka bartur tek Hatim Baxhaku.

“Nga sot, me pajtimin e Kryesisë së Degës, autorizimet e mia i kam bartur tek Nënkryetari Dr. Hatim Baxhaku i cili, ditëve në vijim do ti bashkëkoordinoi veprimet e aktivitetet me Kryetarin LDK-së, z. Lumir Abdixhiku. Unë vazhdoj të mbetem dhe të angazhohem si anëtar i Kryesisë së Degës, Nënkryetar i LDK-së në qendër dhe deputet i GP të LDK-së”, thotë ai.

Tutje, ai ka pohuar se për të ka qenë privilegj të ishte kryetar i degës.

“Të qenit kryetar i degës ishte privilegj dhe përvojë e mirë, por jam i bindur se me dorëheqjen time po mundësohet një riorganizim më i mirë i LDK-së në Prizren, nëndegëve dhe forumeve, me të cilin do të krijohen parakushtet për afirmimin e të rinjve te Prizrenit, ruajtjen e bërthamës por edhe hapjen e dyerve për më shumë njerëz e kuadro që do ta forcojnë LDK-në dhe do ta bëjnë konkurente serioze për ciklin e ri zgjedhor.

Faleminderit të gjithë votuesve dhe bashkëpunëtorëve që në çdo situatë më qëndruan afër. Ju jam mirënjohës dhe vazhdojmë me punë të mira për vendin e për LDK-në”, shkruan Quni në reagimin e bërë në Facebook.

Ndryshe, Anton Quni ishte kandidat i LDK-së për kryetar të Prizrenit. Ai ishte radhitur i treti në garë.

Më Shumë

Aksident mes tri veturave në Kijevë të Malishevës, lëndohet një person

Një aksident i rëndë ka ndodhur mëngjesin e së premtes rreth orës 10:16 mes tri veturave në Kijevë të Malishevës. Lajmin për Front Online e...

33 vjet nga vendimi për Aksionin e Pajtimit të Gjaqeve

33 vjet më parë Myrvete Dreshaj, Have Shala, Adem Grabovci dhe Brahim Dreshaj dhe Lulëzim Etemaj e kishin marrë vendimin për të filluar Aksionin...

Lajmet e Fundit