Ministria e Arsimit, Shkencës dhe Teknologjisë (MAShT) ka marrë vendim për anulimin e testit të arritshmërisë të mbajtur më 21 maj 2016 në komunat: Gjilan, Dragash dhe Hani i Elezit.
MAShT-i ka bërë me dije se përsëritja e testit në këto komuna do të bëhet më 8 qershor nga ora 10:00.
“Vendimi është marrë pas rekomandimit të grupit të ekspertëve të Divizionit për Vlerësim, Standarde dhe Monitorim, i cili i ka vlerësuar joreale dhe jo të besueshme rezultatet e testit në këto komuna, si dhe administrimit jo të mirë të këtij procesi”, thuhet në njoftimin për medie të MAShT-it.
MAShT-i ka obliguar drejtoritë komunale për arsim në këto komuna, që t’i njoftojnë me kohë nxënësit dhe t’i bëjnë përgatitjet e nevojshme për realizimin e standardeve të pranueshme të administrimit të këtij vlerësimi.