Futbollistët shpeshherë bien ndesh me ligjin dhe kjo i ka ndodhur edhe portierit të Tottenhamit, Hugo Lloris. Ai është arrestuar për shkak se një test për masën e alkoolit në gjak zbuloi se po ngiste në gjendje të dehur.
Kapiteni i Francës dhe i Spurs u ndalua nga policia në Gloucester Place, në Londër. Më pas ai qëndroi rreth 7 orë në qeli, para se të ngrihej akuza zyrtare ndaj tij dhe të lirohej kundrejt pagesës për lirinë me kusht, para se të shfaqet para gjykatësve në Westminster muajin e ardhshëm.
Arrestimi i tij është një befasi e madhe, pasi bëhet fjalë për një ndër futbollistët më të qetë dhe të kulturuar në qarkullim. Lloris është i martuar dhe ka dy fëmijë.
Francezi e ka nisur karrierën te Nice, para se të transferohet tek Lyon në vitin 2008. Pas 4 vitesh aty, ai kaloi në Angli te Tottenhami, duke u bërë tashmë kapiten i skuadrës së drejtuar nga Pochettino, me mbi 200 ndeshje për Spurs dhe mbi 100 për Francën.