Tabela e rrugës në fshatin Ballanicë të Malishevës nuk ka qëndruar gjatë. Ajo është hequr nga banorët e këtij fshati.
Arsyeja e heqjes është skandaloz. Banorët nuk duan që rruga e tyre të mbajë emrin e dëshmorit, Agim Elshani-Malisheva.
Burimet e “PrizrenPress”-it bëjnë të ditur se kryetari Malishevës Ragip Begaj, ka caktuar një takim me banorët e fshatit, për të diskutuar rreth heqjes së tabelës së rrugës, që mban emrin e dëshmorit.
“Kryetari ka caktuar një takim me banorët për të parë se heqja e tabelës a është bërë nga individ, apo nga Kryesia e fshatit”, tregon burimi për “PrizrenPress”
Ndërkaq, bashkëluftëtarët e Agimit, e kanë quajtur të ulët veprimin e heqjes së tabelës.
“Është shumë i ulët veprimi i banorëve të fshatit Bellanicë, të cilët larguan tabelën e rrugës me emërimin e dëshmorit të kombit Agim Elshani e cila fillon nga xhamia e Bellanicës dhe vazhdon deri në fshatin Ngucat”, thotë veterani i UÇK-së, Milazim Elshani
Sipas tij, Agimi nuk është vetëm i fshatit të tij, Ngucat.
“Agimi është i Kosovës, Preshevës, Medvegjës , Bujanofcit dhe trojeve tjera shqiptare”.
Ai thotë se Agimi luftoi edhe për lirinë e banorëve të Bellanicës.
“Disa metra rrugë nuk duhet t’i pengojë bartja e emrit të dëshmorit”.
Projekti për emërimin e rrugëve është shumë i rëndësishëm për të gjithë qytetarët e komunës sonë.
“Mendoj që ekzistojnë rrugë ligjore të cilat merren me parregullsi, por ky veprim i ngutshëm dhe qyqarë nuk i bën nder askujt, përkundrazi lëndon familjen dhe bashkëluftëtarët”.
Elshani thotë se nëse tabela e rrugës me emrin e dëshmorit nuk kthehet në mënyrë ligjore, atëherë bashkëluftëtarët e Agimit, do të vendosin sërish atë në vendin ku ka qenë.
“Bashkëluftëtarët e Agimit nuk do të rrinë duarkryq”,paralajmëron ai./PrizrenPress.com/