Presidenti i Barcelonës, Josep Maria Bartomeu, ka bërë të ditur se është i kënaqur me transferimet që ka bërë ekipi i tij gjatë këtij afati kalimtar dhe nuk është duke planifikuar të bëjë edhe ndonjë tjetër, kështu duke mohuar tentativat për blerjen e Paul Pogba.
“Ne jemi të kënaqur me punën tonë gjatë këtij afati kalimtar me blerjet dhe shitjet, dhe dua të falënderoj njerëzit që gjithmonë harrohen, drejtorin ekzekutiv, Oscar Grau, drejtorin menaxhues, Pep Segura, drejtorin tonë të futbollit, Eric Abidal dhe asistentin e tij, Ramon Planes” ka thënë Bartomeu.
Spanjolli nuk la pa përmendur edhe legjendën e Barças, Andres Iniesta, duke mos përjashtuar një kthim të tij të mundshëm në klub.
“Koha e tij si lojtar këtu ka përfunduar, por ai do të kthehet në ndonjë pozitë tjetër që tashmë e kemi biseduar” shtoi ai.
Kjo nuk është hera e parë që flitet rreth një kalimi të mundshëm të Pogbas në “Camp Nou”.