Në mbledhjen e tretë të radhës së Kuvendit të Komunës së Malishevës, i pari i komunës, Ragip Begaj, me kërkesën e anëtarëve të KK-së, dje ka prezantuar para tyre, përbërjen e qeverisë komunale, programin qeverisës dhe projektet kapitale. Paraprakisht, KK i Malishevës, mori një mirënjohje nga OSBE, për bashkëpunimin e ndërsjellë mes KK të Malishevës dhe OSBE-së.
Gjatë seancës së KK në Malishevë, Shefi i Zyrës Rajonale së OSBE-së në Prizren, Ulrich Biffar gjatë adresimit ka uruar anëtarët e ri të kuvendit komunal duke theksuar bashkëpunim të mire midis OSBE-së dhe komunës, ai gjithashtu theksoi se “OSBE-ja do të vazhdon me përkrahjen për komunën”. Në fund Ulrich Biffar i dhuroi kryesuesit të KK të Malishevës, Enver Hoti, një mirënjohje për bashkëpunim të mirë me OSBE-në.
Më pas, Kryetari i Komunës së Malishevës, Ragip Begaj, para anëtarëve të KK-së, prezantoi drejtorët e drejtorive komunale, përgatitjen e tyre profesionale, si dhe prezantoi programin e tij qeverisës dhe projektet kapitale për vitin 2014.
“Drejtorët janë përgjegjës për punën e tyre dhe së bashku me mua, besoj se fuqishëm se do t’ia dalim me sukses”, tha Bega, duke e prezantuar me pas, një nga një secilën drejtori, planin e punës dhe objektivat.
Sipas listës së projekteve kapitale, të prezantuara para anëtarëve të KK-së, përveç së paku pesë shkollave, planifikohen edhe ndërtimi i katër rrugëve të reja, ujësjellësi për fshatin Drenoc dhe fshatrave tjera, përfundim të kanalizimeve, investime në bujqësi, angazhim maksimal kundër etheve hemorragjike dhe të tjera.
Në mbledhje të KK të Malishevës, u morën një sërë vendimesh me rëndësi, duke filluar vendimi për formimin e Këshillit Komunal për Siguri në Bashkësi (KKSB), u miratua Plani i punës së Kuvendit të Komunës për vitin 2014, Rregullorja për taksa, ngarkesa dhe gjoba komunale për vitin 2014, pastaj është miratuar kërkesa e drejtorisë për buxhet dhe financa, për destinimin e të hyrave të bartura nga viti 2012 dhe 2013, në vitin fiskal 2014, si dhe u mor vendim për funksionalizimin e komisionit të aksionarëve të Komunës së Malishevës.
Po ashtu në mbledhje, u mor vendim edhe për formimin e komisionit për ndryshimin e statutit të Komunës së Malishevës, komision i cili do të përbëhet nga tetë anëtar dhe udhëhiqet nga kryesuesi i KK të Malishevës, Enver Hoti. /PrizrenPress.com/